मर्चवार सन्देश
रुपन्देहीको सिद्धार्थनगर नगरपालिका–८ स्थित बीपी पथमा सञ्चालित सिद्धार्थ अल्मुनियम उद्योगमा चोरी भएको छ । सोमबार राति उद्योगको पछाडिपट्टीको च्यानलको ताला तोडेर विभिन्न मेसिन चोरी भएको उद्योगका सञ्चालक सोहन हरिजनले बताउनुभयो ।
सञ्चालक हरिजनका अनुसार करिब डेढ लाख रुपैयाँ बराबरको चोरी भएको छ । मंगलबार बिहान पौने १० बजे उद्योग खोल्ने क्रममा चोरी भएको थाहा भएको उहाँले जानकारी दिनुभयो । घटनाबारे प्रहरीलाई जानकारी गराइएको उहाँले बताउनुभयो ।
यसअघि सिद्धार्थनगर नगरपालिका–६ मा सञ्चालनमा रहेको उक्त उद्योग विगत ७ महिनादेखि बीपीपथमा सञ्चालन हुँदै आएको छ । उद्योगमा हाल ८ जना कर्मचारी कार्यरत छन् । मेसिन चोरी भएपछि उद्योगको नियमित कामकाजमा समस्या भएको सञ्चालक हरिजनले बताउनुभयो ।
सिद्धार्थ अल्मुनियम उद्योगमा अल्मुनियमका झ्याल, ढोका, पार्टिसन, किचन डेकोरेसन, रेलिङ तथा गेट निर्माणलगायत अल्मुनियम र ग्रिलसम्बन्धी विभिन्न काम हुँदै आएको छ ।
